Estación Cultural @Lugo

Unha proposta aberta para rehabilitar a antiga estación como novo nodo público de cultura, comunidade e comunicación, en diálogo directo co Vello Cárcere.

Como lucense e como arquitecto, presento esta proposta movido por unha convicción moi sinxela: a antiga estación de autobuses de Lugo non é un baleiro sen memoria, senón unha peza urbana de grande valor, situada nun punto decisivo da cidade e con capacidade para ofrecer unha nova vida pública ao servizo de todos.

A miña intención non nace dun interese particular, senón do afecto fondo por Lugo e do desexo de contribuír, desde a miña experiencia profesional, a que a cidade tome unha boa decisión sobre un dos seus lugares máis sensibles.

Creo que, antes de derrubar, simplificar ou fragmentar, Lugo debe estudar con rigor a posibilidade de reutilizar intelixentemente este edificio, activar a súa gran dársena como espazo cidadán e pensar o conxunto con ambición cultural, urbana e patrimonial.

Presento EC@L como unha base de reflexión e diálogo, aberta á participación e ao contraste, porque estou convencido de que aquí non está en xogo só o futuro dun edificio, senón unha auténtica decisión de cidade.

A Estación Cultural @Lugo pode ser unha gran peza pública contemporánea, en diálogo directo con O Vello Cárcere, capaz de formar un auténtico conxunto cultural multidisciplinar para a cidade do século XXI.

O Vello Cárcere xa ten unha vocación clara como espazo cultural e cidadán. A oportunidade está, precisamente, en non duplicalo, senón en complementalo. É dicir: facer da antiga estación a gran infraestrutura flexible que lle falta a Lugo para ampliar a escala, a diversidade e a intensidade da súa vida cultural.

© Carlos Sánchez-Montaña - 2026

Arquitecto

Queres apoiar, facer achegas ou solicitar información?

Escribe a:  estacionculturallugo@gmail.com

Dossier do proxecto: https://estacionculturallugo.blogspot.com